سوال:-ایک شخص نے اپنی بیوی سے کہا کہ میں نے تمہیں طلاق دے دی پھر بیوی نے کہا کیا میں تمہارے لیے حرام ہوں تو شوہر نے کہا میں تیرے لیے حرام اور تو میرے لیے حرام پھر شوہر نے کہا میں نے تجھے اپنے نکاح سے خارج کر دیا تو ایسی صورت میں بیوی پر کون سی طلاق واقع ہوگی نکاح سے خارج کر دیا کے لفظ سے بلا نیت طلاق واقع ہوگی یا نیت ہونا شرط ہے؟

الجواب:-صورت مسئولہ میں جب شوہر نے بیوی سے کہا کہ میں نے تمہیں طلاق دے دی اس سے رجعی واقع ہوگی پھر شوہر نے بیوی کے جواب میں کہا تو میرے لیے اور میں تیرے لیے حرام ہوں اس سے بھی ایک طلاق بائن واقع ہوگی(لفظ حرام عرف کی وجہ سے صریح ہو گیا، جیسے لفظ طلاق سے طلاق رجعی بلا نیت واقع ہوتی ہے اسی طرح لفظ حرام سے بھی عرف کی وجہ سے بلا نیت طلاق واقع ہو جائے گی لیکن لفظ حرام کے کنائی ہونے کی وجہ سے بائن واقع ہوگی) کل ملا کر بیوی پر دو طلاق واقع ہو گئی اس کے بعد جو لفظ "نکاح سے خارج کر دیا" سے طلاق واقع نہیں ہوگی بلا نیت کے مگر یہاں نیت کے ساتھ بھی طلاق واقع نہ ہوگی اس لیے کہ اس کو پہلے طلاق بائن پڑ گئی ہے اور "نکاح سے خارج کر دیا" یہ بھی کنائی ہے اس سے بھی طلاق بائن ہوتی ہے اور قاعدہ ہے کہ بائن بائن کے ساتھ لاحق نہیں ہوتی لہذا صورت مسئولہ میں دو طلاق ہوئی اور "نکاح سے خارج کر دیا" اس سے کوئی طلاق واقع نہ ہوگی-